Azərbaycanın Xarici İşlər Naziri Elmar Məmmədyarov ölkədəki xarici radiolarla bağlı Amerika Birləşmiş Ştatlarının (ABŞ) Helsinki Komissiyasının rəhbərliyinə məktub göndərib.

"Azadlıq" radiosunun bu məlumatında bildirilir ki, Elmar Məmmədyarovun məktubu ABŞ Helsinki Komissiyasının rəhbərliyində təmsil olunan Əlsi Hastinqsə, Benjamin Kardinə və Kristofer Smitə ünvanlanıb. Məktubda bildirilir ki, xarici radiostansiyaların FM dalğasında yayımının dayandırılması Azərbaycanda 2002-ci ildə qəbul olunmuş "Televiziya və radio yayımı haqqında" qanuna əsasən həyata keçirilib. ABŞ-ın Helsinki Komissiyası isə  hökumətin xarici radiolarla bağlı bu qərarını mənfi qarşılayıb. Belə ki, komissiyanın sədri Əlsi Hastinqs baş verənləri ictimaiyyətin informasiya çıxışını məhdudlaşdırmaq kimi qiymətləndirib və deyib ki, bu qərar Azərbaycanın Birləşmiş Ştatlarla münasibətlərinə mənfi təsir edəcək.

Xatırladaq ki, Milli Televiziya və Radio Şurası (MTRŞ) yanvarından 1-dən Azərbaycanda fəaliyyət göstərən üç xarici radionun "Azadlıq ", "Amerikanın səsi " və BBC-nin FM tezliyində yayımını dayandırıb. Hazırda bu radiolar öz yayımları qısa dalğa, internet, kabel vasitəsi ilə davam etdirirlər.