Reportyorların Azadlıq və Təhlükəsizlik İnstitutu (RATİ) gənc bloqçular Emin Milli  (Abdullayev) və Adnan Hacızadə barəsində  seçilmiş həbs-qətimkan qərarını dəyişdirilməsi ilə  bağlı vəsatətin Bakı Apellyasiya Məhkəməsində  təmin etməməsindən təəssüfləndiyini bəyan edir.  RATİ həmçinin məhkəmədə KİV nümayəndələri və müşahidəçilərin iştirakına şərait yaradılmasını və çəkiliş aparmalarına icazə verilməsini alqışlayır.

Belə  ki, bu gün (22 dekabr) Bakı Apellyasiya Məhkəməsində  gənc bloqçuların Səbail rayon məhkəməsinin 11 noyabr 2009-cu il tarixli qərarından verdikləri apellyasiya şikayətinə baxılmışdır. İyulun 8-də şərlənərək həbs olunan gənclərə qarşı Adnan Hacızadə və Emin Millinin vəkillərinin həbs-qətimkan tədbirinin dəyişdirilməsi ilə bağlı vəsatəti hakim tərəfindən təmin edilməmişdir. Vəkillər girov qoyularaq gənclərin azad olunması ilə bağlı da vəsatət versələr də, bu da təmin olunmamışdır.

Emin Milli və Adnan Hacızadə 8 iyul tarixində təxribata çəkilməklə döyülərək xəsarət alıblar. Zərərçəkmiş şəxs qismində polisə müraciət etmələrinə baxmayaraq, onlar şərlənərək həbs olunublar. Cinayət Məcəlləsinin 221-ci (xuliqanlıq) maddəsi ilə başlanmış cinayət işi ciddi hüquq pozuntuları və qanuna zidd hərəkətlərlə aparılmış və istintaqın gedişatında gənclərə qarşı daha bir saxta ittiham – CM-in  127-ci (qəsdən bədənə az ağır xəsarət yetirmə) maddəsi ilə ittiham irəli sürülmüşdür. Bu ittihamlara əsasən, Emin Milliyə 2 il 6 ay, Adnan Hacızadəyə isə 2 il müddətinə azadlıqdan məhrumetmə cəzası verilmişdir.

RATİ  bildirir ki, bu vəsatətin qəbul olunmaması Azərbaycanda girov qoyularaq azad olunma mexanizminin işləmədiyinin, xüsusilə  də siyasi sifarişlə həbs olunmuş şəxslərə  şamil olunmamasının göstəricisidir.

RATİ  bir daha bəyan edir ki, yerli və beynəlxalq ictimaiyyət tərəfindən Vicdan Məhbusu kimi tanınan bu bloqçular sırf ifadə azadlığının qurbanı olaraq, həbs olunduqları üçün dərhal azad olunmalıdırlar.

 

RATİ  Bakı Apellyasiya məhkəməsini Səbail rayon məhkəməsindən fərqli olaraq, ədalətli qərar çıxarmağa və gəncləri azad etməyə çağırır.