Fevralın 5-də Nəsimi rayon Məhkəməsində hakim İkram Şirinovun sədrliyi ilə “Təzadlar” qəzetinin baş redaktoru Asif Mərzilinin Mətbuat Şurasının sədri Əflatun Amaşova qarşı iddiasına əsasən məhkəmə hazırlıq prosesi keçirilib. Bu barədə Reportyorların Azadlıq və Təhlükəsizlik İnstitutuna (RATİ) “Təzadlar” qəzetinin baş redaktoru Asif Mərzili məlumat verib.

Onun bildirdiyinə görə, prosesə cavabdeh tərəfdən heç bir nümayəndə qatılmayıb: “Hakim MŞ-nın sədri Ə. Amaşovla telefon əlaqəsi saxladı və cavabdeh tərəfin iştirakı olmadan hazırlıq iclasının keçirilməsinə qərar verdi və növbəti prosesi 19 fevral saat 15:00-a təyin etdi”.    
Xatırladaq ki, iddiaya səbəb MŞ-nın Şikayətlər Komissiyasının 16 sentyabr 2009-cu il tarixli rəyinin İdarə Heyətinin iclasında müzakirəyə çıxarılmadan, məhkəmə qərarı, ekspert rəyi olmadan KİV-lərdə və elektron mediada MŞ sədrinin qəzetin işgüzar nüfuzuna xələl gətirən ifadələr işlətməsi və qəzeti “reket” nəşr elan etməsidir. İddiada cavabdeh tərəfdən KİV-lərdə təkzib verilərək üzr istəməsi, eləcə də vurulan mənəvi ziyana görə 50 000 (əlli min) manat təzminat ödəməsi tələb olunur.