Beynəlxalq hüquq-müdafiə təşkilatları həbs olunmuş bloggerlər - Adnan Hacızadə və Emin Millinin (Abdullayev) apellyasiya şikayətinin Bakı Apellyasiya Məhkəməsində  təmin edilməməsini pisləyən bəyanatlar yayıblar.

 “Biz Azərbaycan hakimiyyətinin ifadə azadlığını kriminallaşdırma təcrübəsini davam etdirməsindən narahatıq və Azərbaycan hökumətini Adnan Hacızadə və Emin Millini dərhal azad etməyə çağırırıq” - deyə Jurnalistləri Müdafiə Komitəsinin Avropa və Mərkəzi Asiya üzrə Proqram Koordinatoru Nina Ognianova bildirib.
Human Rights Watch təşkilatının Cənubi Qafqaz üzrə tədqiqatçısı Giorgi Gogia isə bildirib ki, Azərbaycanda hazırkı hakimiyyət hələ də ifadə azadlığı üçün maneələr yaradır. “Bu hal Azərbaycanda hakimiyyətin jurnalist və fəallara qarşı  irəli sürdüyü uydurma ittihamların biabırçı halda davam etdirilən hissəsidir. Emin Milli və Adnan Hacızadənin həbsdə saxlanılması hakimiyyətin söz azadlığına olan düşmənçiliyini əks etdirir. Hakimiyyətin blogerləri azad edərək bunun əksini sübut etmək şansı var” - deyə G.Gogia bildirib.
Amnesty İnternational təşkilatının Avropa və Mərkəzi Asiya üzrə proqram direktorunun müavini Andrea Huber  bildirib ki, Adnan Hacızadə və Emin Milli Azərbaycan səlahiyyətlilərinin hakimiyyətə qarşı tənqidləri yox etmək məqsədilə atdıqları repressiv addımların qurbanına çevriliblər. “Ölkənin söz azadlığı hüququnun qorunması ilə bağlı beynəlxalq öhdəliklər götürməsinə baxmayaraq, Azərbaycanda müstəqil jurnalist və fəallar zorakılıq və həbslə üzləşməyə davam edir” - deyə Andrea Huber vurğulayıb.
Xatırladaq ki, Emin Milli və Adnan Hacızadə 08 iyul tarixində  axşam saatlarında  dostları ilə Bakıda “Lebonese” (Livan) restoranında yemək yeyərkən qonşu masada onların söhbətini dinləyən idmançı görkəmli iki nəfər təxribatçı hücum edərək, Emin Milli və Adnan Hacızadəni döyərək, onlara xəsarət yetirib. Zərərçəkmiş şəxs qismində şikayət etmələrinə və xəsarət almalarına baxmayaraq, Səbail RPİ onlara xəsarət yetirənləri sərbəst buraxmış və döyülən gənclərin 48 saat müddətinə şübhəli şəxs qismində saxlanmasına qərar vermiş, iyulun 10-da isə Səbail rayon məhkəməsi “xuliqanlıq” maddəsi ilə təqsirləndirilən gənclər barəsində 2 aylıq həbs-qətimkan tədbirinin seçilməsi ilə bağlı qərar çıxarıb.  İyulun 20-də  Apellyasiya məhkəməsi sözügedən qərarı qüvvədə saxlayıb. Cinayət işinin istintaqı yekunlaşdırılıb və gənclərə qarşı 221.1.2 (xuliqanlıq) və 127 (qəsdən bədənə az ağır xəsarət yetirmə) maddələri ilə ittiham irəli sürülmüş və iş baxılması üçün məhkəməyə göndərilmişdi. Noyabrın 11-də Səbail rayon məhkəməsi Emin Millinin 2 il 6 ay, Adnan Hacızadənin isə 2 il azadlıqdan məhrum edilməsi ilə bağlı qərar çıxarmış və Bakı Apellyasiya Məhkəməsi 10 mart 2010—cu ildə həmin hökmün qüvvədə saxlanılması barədə qərar çıxarıb.